10月08日(三) 17:33【on.cc東網專訊】 雖然喺港鐵度日逼夜逼，已經成為好多港人嘅「辛酸」之一，不過正所謂物以罕為貴，對於平時出入都有保母車代步，或者自己駕車嘅藝人嚟講，搭港鐵都係一樣幾新鮮刺激嘅經驗。
繼前日靚靚同張智霖走去搭港鐵之後，今日輪到佢哋嘅好朋友郭富城接力！因為中環干諾道中封路嘅關係，城城就走去搭港鐵。不過唔知係咪驚畀人認出，引起混亂，城城將自己包到實一實，除咗Cap帽遮到落眼，仲要個口罩都戴得好高吓，雖然咁嘅裝扮未必會有人認出，但望多兩眼似乎在所難免。
但奇就奇在，城城雖然「奇裝異服」，但港鐵入面嘅乘客似乎「不為所動」，而十年無踏足過港鐵車廂嘅城城，成功自拍呢張「歷史性」照片後，即刻喺微博留言話：「第一次親眼看見干諾道中被鐵馬所封！沒有的士，司機車也被阻塞！現在去乘搭地鐵（港鐵）了！數數手指十年沒坐過……比開車快多了！下次見。」

郭富城揸辣跑撳銀紙
09月19日(五) 07:20【on.cc東網專訊】 年屆48歲的郭富城，廿年如一日一樣都係咁fit，一身鋼條身型另加單身又身家豐厚，難怪一直被捧為鑽石級的筍盤，自從他和熊黛林分手，重新放盤推出巿面，馬上令不少妙齡o靚模虎視眈眈，希望攀上新任城嫂之位。
享受寡佬生活的城城，得閒玩跑車，做馬主，早排更考埋船牌，攞正牌可以揚帆出海招呼三五知己遊船河，如此多姿多彩，唔怪得城城唔想咁快搵個固定女友再被綁。日前夜媽媽城城突然心郁郁想出街，唔約人打邊爐一於搵架戰車跑返轉，屋企有晒世界頂級辣跑，甚麼幽靈之子、保持捷、林寶堅尼全部都有，當晚城城由眾多靚車中揀咗價值600萬的特別版599GTO火紅法拉利離開家門。
當晚12時許城城先到跑馬地銀行理財中心，去櫃員機撳番啲「散紙」出嚟，只見他將架幾百萬的靚車隨街泊，然後行到最角落部櫃員機，撳完錢後城城頭耷耷地步出，話晒天王級巨星，對鏡頭相當敏感，行完三步己經發現記者，笑笑口兼手指指地望向鏡頭，繼而chok到爆行去攞車，跟住當然是「呼」一聲絕塵而去。

愛駒大熱倒灶攞第三　城城：可能檔位問題
09月14日(日) 17:17【on.cc東網專訊】 歌手郭富城（城城）到沙田馬場觀看愛駒「愛的呼喚」出戰，留了鬍鬚、戴上黑超的他，以全身形象示人。城城與經理人小美及好友香港著名舞蹈家Sunny Wong，一行二十人現身馬匹亮相圈，城城一到場，即引起全場觀眾起哄，有馬迷大叫：「城城去唔去馬！」
問到可有信心贏馬？邊行邊接受訪問的城城，笑笑囗表示：「平常心，冇話有冇信心，盡量跑啦。（隻馬狀態點？）狀態佢（愛的呼喚）OK，一直都穏定，似我咁Fit！（有信心贏？）冇話贏硬。（有冇投注？）買小小玩吓。）
於下午4時35分，其愛駒「愛的呼喚」於第八場出賽，一行人由沙圈移師到貴賓觀看台，期間有不少馬迷要求合照，而城城亦相當親切，不時向現場人士揮手及微笑。比賽開始時，小美不時走出觀看台欄外吶喊，而城城則留在觀看台內靜待結果。
最終結果，身為頂頭大熱的「愛的呼喚」大熱倒灶奪第三名，問到城城心情如何？城城離開前，若有所失說：「賽馬係咁，第三已經算好好，第三有交代。（失望？）賽馬運動要正面咁睇，隻馬都好忠心，保持係三甲內。（企嘅位置唔好？）有小小，可能檔位問題，開始時冇得發力。（太多朋友到場支持有壓力？）今日先開鑼，算有交代，當然大家都想我贏。」