米高奧雲襲港想同城城做Gym
01月25日(日) 15:20 【on.cc東網專訊】 前英格蘭球星米高奧雲（Michael Owen）出席馬場紀念盃活動，他表示非常高興再次與品牌合作：「好開心再次嚟到呢度，今年係第二年喇，覺得呢度好有熱情，好緊張刺激！」他續透露好期待見到郭富城（Aaron）：「好想同佢一齊健身，同埋我哋有一個共同興趣，就係賽馬。」
留港三天的Michael透露昨晚已品嚐香港地道美食，至於明天將另有行程：「聽日將會同香港足球隊交流球技，睇吓今晚會唔會再去好食嘅餐廳食嘢。」問到如果郭富城向他的馬房買馬有何感覺？他說：「好啊，我都期待，（會幫佢訓練馬隻？）我有兩個練馬師，睇吓有冇呢個機會，（畀discount佢？）佢唔需要架啦！」
城城首度回應舊愛Lynn戀情：戥佢開心
01月25日(日) 16:15【on.cc東網專訊】 天王郭富城（Aaron）出席馬場紀念盃活動，他甫出場即與前英格蘭球星米高奧雲（Michael Owen）雞啄唔斷，兩人友誼顯然易見！Aaron表示近來因拍戲而消瘦不少：「瘦咗好多啊，因為唔係幾舒服，喺無錫拍戲好凍，今次係做孫悟空角色，成身都好多毛。」他續笑謂：「最搞笑係今次返嚟睇醫生，醫生話我依家個症狀係又熱又冷。（打針快好啲？）中醫唔主張打啊。（幾時再返去拍？）聽日做千嬅嘉賓，後日先返去拍，鞏俐等緊我，今次劇組陣容好好，又有大哥（洪金寶）做武術指導，覺得佢好有經驗。（好嚴格？）佢好嚴格同好認真。（冇冇傷？）有啲面傷、皮膚受傷，因為啲膠水會溶，之後要好好去保護番啲皮膚。」
唔想再講負面新聞：希望大家尊重番我
談到最近被指愛o靚妹而成為新聞焦點，他再三表示已在微博交代清楚：「新聞喺微博講晒啦，唔想再回應，再回應就變連續劇，同埋我已經寬恕傷害我嘅人。（唔係事實？）微博已經講晒啦。（會唔會追究？）唔會追究啦。（經理人小美之前發聲明話追究？）微博講晒啦。（對你形象有影響唔係第一次？）唔想再兜圈講呢啲啦，微博已講晒，最緊要係做好自己。（以後會唔會再喺社交網站add後輩？）唔再回應嗰啲事啦，因為好多內容同新聞都唔係事實，呢啲嘢侮辱得我好緊要，希望大家尊重番我。」
唔刻意強求緣份
談到舊愛熊黛林（Lynn）曾祝福他早日找到另一半，問會否祝福對方現覓得真命天子？他大方說：「身邊每個開心都會祝福。（你會祝福佢？）當然會祝福，我自己呢兩年感情空白，大家關心我嘅時間，我都係擺晒工作上，用心做好工作。（唔dry咩？）緣分天注定，唔會刻意強求，呢兩年冇諗，只希望完成理想工作，亦希望刻意中傷我嘅人快啲收手啦。」
要求另一半內外美兼備
問到Lynn曾暗示他讓人缺乏安全感？他說：「過去嘅事唔再評論，因為我係男人，好多嘢放喺心上，我會去承受，外間睇我點點點，我唔會用口去批評任何人，呢個唔係我風格同態度，男人應該要有風度，呢排見到佢咁幸福，我都好戥佢開心，見到圈內任何人開心，自己都開心，自己雖然工作辛苦，但依家冇嘢可以令我分心工作，不過我都希望將來上天安排一個好錫、好體諒同明白我嘅另一半畀我，自己都會諗吓有一個幸福家庭，唔知係咪我要求高。（要求係咩？）要有內涵，內在美同外在美。」

風雨不改做運動　城城跑步唔發呻吟聲發歌聲
09月24日(三) 17:13【on.cc東網專訊】 天王郭富城以一身運動裝出席活動時，坦言自己做一場三小時的演唱會所需的體力，比起跑十公里更多。他透露自己每天最少做三十分鐘至一小時運動，風雨不改，續說：「如果職業嘅運動員，跑十公里大概半個鐘。我自己就大概半個鐘跑五公里，因為我係要訓練耐力，而唔係爆發力，咁對唱歌、跳舞都有幫助。其實我Keep住每日跑步都超過10年以上，有時工作要去唔同地方，做完嘢半夜三更，就會跑跑步機。我入住酒店嘅要求，就係健身室要24小時開放。有時拍戲啲地方山長水遠，冇跑步機，我就會帶繩去跳，其實跳繩都好辛苦，做30分鐘都夠。不過都試過跑走廊，因為成層都係劇組嘅工作人員。（男人做運動成日都會發出呻吟聲架喎。）嗰啲係頂唔順，我多數發出歌聲嘅，邊唱邊走。」
跑十公里怕成焦點
城城主張都市人每天再忙都要做運動，因在辦公室工作的人平日沒有機會舒展筋骨，不應以沒有時間作藉口。他說：「做運動體內會釋放出安多酚，會令人上癮，對皮膚、心臟同新陳代謝都好，做運動會將體內壞細胞都排走。」另外，他坦言非常希望參與十公里跑步賽事，但由於怕自己成為傳媒焦點，會阻礙其他參賽者，故遲遲未實行。