Sources: TungStar /
城城「愛將」贏過二百萬
12月04日(三) 19:35【on.cc東網專訊】 郭富城為香港賽馬會活動擔任主禮嘉賓，大讚推出的新apps非常簡便，能清楚了解賽馬實況、馬匹狀況與騎師資料：「經常溫習賽馬資料，中獎機會率都會提高啲，不過唔好盲目投注，要用心鑽研。」

問過往兩匹愛駒「愛將」與「愛的呼喚」戰績？他自信地說：「我唔叻，但同朋友o既馬匹出賽都會支持，我只係選擇性投注。我匹『愛將』到現時為止都一共賺咗二百幾萬，已經Cover咗買馬同養馬成本。（今年會否再買多隻馬？）今年冇諗住再抽，我本身兩隻馬已經好足夠，不過遇到朋友投緣同投契都可以合資買隻。始終養馬都係開心事，贏更係好，不過最開心係喺馬圈同好多朋友碰面，認識更多朋友，可以一齊談天說地。」

他坦言養馬是投資與考眼光，自言好彩，平日面對工作壓力，不時要鞭策自己，賽馬可以減壓，暫時放下工作，享受欣賞賽事的一刻。但他勸告馬迷買馬要理智，應視為遊戲看待，不要沈迷，要量力而為。

郭富城張智霖「愛將」拉頭馬
11月17日(日) 20:06【on.cc東網專訊】 郭富城與張智霖入馬場捧愛駒「愛將」即拉頭馬，兩人開心得噴香檳慶祝，二人透露希望愛駒下次試跑長路程，實行向經典一里賽進軍。

而李嘉欣亦有出席活動，夫婿許晉亨獨自入馬場捧愛駒「一寶」，一寶由13屆冠軍騎師韋達策騎勝出馬會短途錦標賽，成為香港短途錦標賽香港主隊的最大希望。

郭富城奪非專業組全年總季軍
11月10日(日) 22:26【on.cc東網專訊】 郭富城晚上出席在澳門舉行的《Audi R8 LMS盃》慶祝派對，雖然城城在最後一回合賽車中被「死敵」中國女車手張冉撞到車尾，無法完成賽事，但累計全年成績，城城依然能夠勇奪「2013年度Audi R8 LMS盃非專業組全年總季軍」，據悉，因各車手之間分數非常接近，故城城都是在頒獎時才知道自己能夠獲獎。

城城遭死敵啄尾無法完成賽事

11月10日(日) 15:52【on.cc東網專訊】 郭富城參加最後一回合在澳門舉行的《Audi R8 LMS盃》，經過頭十輪賽事後，城城在非專業組別排名第三，本有望捧走季軍。豈料繼昨日在排位賽炒車啄尾後，禍不單行的城城在進行最後一回合，第八個圈賽事時，因天雨關係在葡京彎輕微撞欄，最後「死敵」中國女車手張冉收掣不及，撞到城城車尾，令兩人無法完成賽事。而城城的戰車左邊車頭燈、倒後鏡及右邊車尾都被撞爛，最後非專業組別由馬清揚贏得該場賽事的第一名。

事後，城城接受訪問時說：「我賽車咁多年，好少遇到落雨，始終我都係業餘，仲學習緊，之前甚至犯咗規例，好似尋日練習時，喺賽道上唔可以越過條黃色線，最後我都過咗兩次，裁判罰我兩個車位，所以由第14步跌咗去17。」

擔心明年冇時間落場

而城城稱本有望拎第三，豈料失手炒車，「我本身時間唔錯，如果計乾地，我覺得有機會拎第三位，去到第6、7個圈都爬咗兩架車頭。不過喺葡京彎唔夠經驗，有少少Lock-up，太跣，自己Brake得太遲。我個心作怪，要追前面兩架車，其實落雨應該早o的brake，最後轉彎時有衝力，衝o左埋去，犯咗呢個錯誤。其實係輕微o既事，我知道架車可以Reverse，反而係後面個女仔唔小心撞埋嚟，令我唔可以繼續比賽，好可惜。」幸好未有受傷，而他遺憾未能完成賽事，及站上頒獎台。問明年可會再接再勵？他說：「好難講，因為下年工作好Full，可能要拍電影同做更多巡唱，可唔可以再參加真係未知數。但我希望有機會可以再跳入架車參賽，做出更快時間。」

城城初戰東望洋啄尾炒車

11月09日(六) 23:04【on.cc東網專訊】 台上歌精舞勁的「舞台王者」郭富城，台下化身「辣車城」，經常揸辣跑在賽道上較勁，他在《第60屆澳門格蘭披治大賽車》的奧迪R8 LMS盃排位賽大騷車技。

賽前信心十足的他，一大早就現身維修站試車，更吸引不少場內人士圍觀拍照。雖然被閃光燈「突襲」，不過城城仍Nice爆豎起拇指對鏡頭微笑，心情輕鬆。未知是否賽前突然被閃光燈騷擾，加上要與職業車手同場較技，「辣車城」一時心急輕撞對手車尾釀成意外，排名第14。

事後城城接受訪問，仍保持輕鬆心情，他解釋：「係小意外，人無嘢。當時架車喺髮夾彎轉入大直路時，想追前面架23號，以為可以過佢，不過當佢減速時，我又咁啱加速，所以錫一錫佢車尾，都唔算係真意外。（會否通知阿媽？）唔講啦，小事，唔想嚇親佢。」之後他大讚自己比熱身賽時快6秒，亦滿意表現：「今日個比賽入面，有12個係職業車手，自己都覺得滿意。」談及明天賽事，他坦言信心不大，但會繼續養精蓄銳，寄望正式比賽可打入業餘組三甲位置。

面對超強颱風的來臨，「辣車城」笑說：「會更刺激，最多還原基本步，慢番6秒。」不過當問戰車車身印有可口可樂的Logo時，曾為百事可樂任代言人的他刻意避談，拒絕回應提問。