風騷現身新濠影匯綜藝館　城城爆想結婚
【on.cc東網專訊】 位於澳門的新濠影匯投資32億美元，是一個以電影為主題的娛樂休閒度假勝地，即將於10月27日隆重開幕。
其中「新濠影匯綜藝館」設有夢幻舞台，舞台王者郭富城（城城）成為首位在「新濠影匯綜藝館」舉行演唱會的歌手，之後還會陸續再有其他巨星在此舉行演唱會。
城城今日下午到澳門為這個影匯綜藝館的啟動禮擔任嘉賓進行儀式，記者會於club cubic嬌比舉行，城城還即場表演了幾個舞步，作為他這次特別版演唱會預演。他表示會於演唱會中設立搖滾區，讓粉絲可以跟他互動，城城說：「呢個搖滾區係我個人演唱會從來未試過嘅，今次個場館嘅設施先做到，為咗配合今次演唱會，我哋設計舞台係為呢個場館打造嘅，呢度嘅設施同新科技先可以做到，天馬行空都可以支援到，係一個夢幻嘅距離，做啲大家意想不到嘅舞台效果，喺歌迷面前跳舞同唱歌，係自己喺舞台上從未試過嘅。（搖滾區可以容納幾多人？）要等大會安排，個場館好似可以坐5,000人。（你到時會拉啲粉絲上台？）都有機會，係近到從未出現過喺我自己嘅舞台上。（呢樣嘢係咪一直都想做？）一直都想做，喺英美啲國際級舞台都唔容許咁做，會有限制，依家可以喺澳門打造到國際級嘅舞台，同我想突破、破格同創新嘅理念一致，所以佢哋搵我打頭陣時，我哋係一拍即合。（演唱會歷時幾長？）我啲演唱會都係三個鐘，個rundown會重新度過，要配合舞台升降位、視覺效果等等，係三面台嘅，我都會參與開會，好多嘢要重新打造。（驚唔驚會有熱情粉絲攬你甚至咀你？）身為歌手都希望可以同歌迷互動，想佢哋透過我嘅舞蹈同歌聲，感受我舞台嘅力量。」
問到城城如此近距離與粉絲接觸，怕否被抽水，他表示：「到時大會會有工作人員控制以防突發事件，會有特別措施應付。我演唱會有握手環節，我試過畀歌迷捉實隻手唔放，仲要拉我埋去，咁大會都有請保安人員保護我，但握手時都成日會受傷，會被抓傷，希望大家錫住我，唔好抓傷我。我都試過畀自己個咪撞親啲牙，依家去握手時識得將個咪放低啲，同埋用手包住個咪，咁撞都係撞到自己啲手指。我最驚係啲歌迷捉住我唔放手拉我埋去，我唔想啲歌迷受傷，因為我愛錫佢哋，我自己受傷唔緊要。如果啲歌迷唔肯放手，最後都會由保安人員分開我哋，但係我隻手已經有愛的抓痕，都習慣咗，習以為常喇。（今次演唱會只係舉行一場？）序幕嚟，係呢個場館嘅序幕，嚟緊會有個國際級巨星接我棒，我可以成為第一位華人歌手喺度打頭陣演出，覺得好榮幸，今次係特別版演唱會，出年紅館嗰個就係另一個舞台同表演項目。今次係好珍貴嘅演出。」
現場見城城左手無名指戴了戒指，問到他是否已結婚，他即說：「呢隻只係飾物，大家誤會咗喇，咁我轉去右手戴喇。（會唔會反映到你其實想成家立室？）我心入面嘅諗法係自己都希望會成家立室同埋有小朋友，因為我本身好鍾意小朋友，不過現階段我嘅工作好繁重同好重要，我媽咪都有叫我抖下，佢見我辛苦，我同我媽咪講叫佢放心，應該休息時我會休息。自己想有突破，努力創一個高峰出嚟，唔容易，會繼續呢個理念。如果達到自己目標，同埋得到大家嘅認同，就去到成家立室嘅時候，都要花幾年時間，可能三年。如果現階段遇到姻緣，亦唔排除會閃婚，都希望得到大家嘅祝福。」

郭富城冇畀媽咪催婚：佢都費事講喇！
03月12日(四) 00:41 【on.cc東網專訊】 郭富城晚上現身將軍澳電視城出席IFPI頒獎禮，憑演唱會原聲大碟榮獲去年本地最高銷量男歌手的城城，坦言已多年未有踏足電視城和接受音樂獎項，但有感今次的成功有賴所有台前幕後人員的努力，故正身在內地拍電影的他特地向劇組請假回港領獎。
同時又稱可以順道休息，他說：「套戲拍到今個月底就拍完，真係好辛苦，套戲我要做孫悟空，每日要用四至七個鐘頭化妝，黐到成身毛連食嘢都唔得，人都瘦咗，而且啲膠水黐響塊面太耐搞到我爛面，拍一日戲就好似做咗兩、三場演唱會咁攰，所以今次返嚟唱歌我覺得好輕鬆。」
今次獲獎後會否令城城想再推出新唱片？他直言：「我而家好隨心，有時間同有好歌當然想出，我都想唱吓情歌，覺得人生經歷多咗，唱出嚟特別夭心夭肺，我好似好乜嘢咁，但表達出嚟會好唔同。」