Sources: TungStar /

郭富城封苟芸慧做女神：面色好兼靚咗
03月13日(四) 15:54【on.cc東網專訊】 郭富城以優雅形象大使身份主持瑞士鐘錶品牌開幕儀式，同場還有緋聞女友苟芸慧（苟姑娘）擔任特別嘉賓，二人大方合照，城城表示專程由北京趕返港出席活動。問見到苟姑娘是否很開心？他說：「開心，舊拍檔再一次合作好開心，有傾偈。」繼而不避嫌大讚對方：「佢容光煥發咗！（瘦咗？）冇留意有冇瘦咗，面色好咗、靚咗，係女神！佢好適合呢個品牌，代表優雅，佢係女神，絕對係女神！（想再合作？）想！唔使猶豫！」問會否怕再傳緋聞？城城即表示二人是專業藝人，並指若果擔心的話，苟姑娘今日也不會出席活動。再問激讚對方是女神的城城，會否約苟姑娘食飯？城城說：「冇諗喎，單純做嘢。」

勞氣否認溝o靚模
此外，提到有指他透過Instagram結識o靚模，城城即一臉認真作出澄清：「係好荒謬嘅報道，原本唔想回應，但太過份、離譜！想講幾句，我禮貌式關注，換嚟咁多創作，喺一啲場合碰面交換關注好正常，我都有add麥當娜，又唔見有人寫？心腸唔係咁好，特登將普通事斷章取義，刻意中傷、抹黑！」

城城更愈講愈勞氣：「我微博都有add唔同朋友，有啲係朋友嘅朋友，呢個係禮貌，但好小題大做，我關注咗一百八十幾個人，有七十幾個男人，包括學者同畫家，但冇人寫，覺得佢哋寫嘢要有啲良心，唔好刻意中傷別人！（唔再關注啲o靚模？）講咗係荒謬報道，生命無常，應該關心世界，唔理所謂閉門造車嘅新聞，有時間我都攞嚟工作，好用心工作，最近為電影練功夫，體會到天地有正氣，退一步海闊天空。」

郭富城叮囑苟芸慧調理好身體
02月23日(日) 18:54【on.cc東網專訊】 天王郭富城以優雅形象大使身份出席浪琴表香港馬術大師賽，他認為馬術適合一家大細來欣賞，又大讚騎馬師十分有型！問前緋聞女友苟芸慧近日病愈清減不少？他說：「每個人身體都會唔舒服，你同我都會關心，健康好重要，希望佢早日康復啦！女仔都要慢慢調理身體。」城城表示不欲多談，以免引起誤會，至於可有聯絡對方，他以私人事不回答。

喜歡原創唔做翻版《星星》

此外，問有否追看近日熱捧的韓劇《來自星星的你》？他說：「我有睇，（開拍電影版有冇興趣？）呢個角色都有得發揮，對於有得發揮嘅工作我都有興趣﹗不過我始終鍾意原創多啲，唔想比較。」他又大讚女主角全知賢底子打得好，加上本身的獨特氣質，所以多年來都Keep得很漂亮。有指舒淇將飾演電影版女主角？他笑言二人各有韻味。

Sources: TungStar /
郭富城揚言挑戰周星馳
12月11日(日) 19:14【on.cc東網專訊】 「舞台王者」郭富城到奧迪金鐘陳列室舉行座駕遞交儀式，他有幸成為僅限量生產333輛，港澳合共只得兩輛，編號270的幻影黑- 珍珠漆（Phantom Black – Pearl effect）Audi R8 GT Spyder 的車主。熱愛賽車運動的郭富城連續兩年出戰奧迪R8 LMS 盃，於今年更代表奧迪香港出賽，並於比賽中勇奪非專業組總季軍，其專業表現及卓越成績有目共睹。奧迪香港預留此全球僅限量旗艦超級跑車予郭富城，一方面答謝他對品牌的無間支持，同時祝願他不論在街道或賽場上都可疾風而馳。

城城在座駕遞交儀式上表示：「很榮幸代表奧迪香港出賽奧迪R8 LMS 盃，更高興於比賽中奪得非專業組總季軍，期待未來日子與奧迪繼續緊密合作。」他亦高興成為奧迪車主，能獲得奧迪香港預留如此珍貴、強悍性能無可匹敵的限量版R8 GT Spyder，令他期待坐上開篷R8 GT Spyder，將賽道上縱橫馳騁的速度感延續到街道上。

Sources: TungStar /
郭富城再買馬考業餘騎師牌
12月08日(日) 15:02【on.cc東網專訊】 天王郭富城到馬場出席活動，問是否準備拉頭馬？他說：「信心一定有，不過係咪嬴晒呢？都要睇騎師發揮、到時走位。隻馬狀況OK。（自己有冇買？）少少，例飛，買一千幾百，支持吓自己隻馬。」他表示愛駒曾贏過4次，但由於其中一次因工作而不在港，故只拉過3次頭馬。

他坦言希望愛駒「愛將」明年能參與國際短途錦標賽：「不過唔會Push佢，順其自然。如果贏咗，我哋幾個馬主都會將啲獎金放入營運基金，我哋都再諗緊出年買多匹馬。」

對於早前有傳他將於年初三賀歲馬中騎馬出場，他即否認其事：「係誤會，我係會喺新年活動騎馬，不過唔想透露喺咩活動，不過應該會向馬會借馬。」更自爆已覓得騎師好友葉楚航太太教他騎馬，他說：「佢係首席華人女教練，已經應承咗教我。我都想出到嚟騎得型啲、靚啲，有板有眼。（點解唔叫葉楚航教？）咁就變咗專業騎師，要策騎。（騎『愛的呼喚』或者『愛將』？）法例規定咗唔畀。」

他曾到上海參觀騎術學校時，被建議考一個業餘騎師牌，但他說：「唔好咁刺激啦！我好忙，今年考咗船牌，出年又考騎師牌？都係演藝事業重要啲。做騎師好危險，『行船跑馬三分險』，騎師同場多競爭、要爭位，馬可能會失蹄。（享受做馬主？）唔知，將來可能考，不過我都係講笑形式咁講。」他表示自己一向都懂得騎馬，亦曾於電影中有騎馬演出，但上一次騎馬已是一年前。