新濠影滙開騷　郭富城重金投億元保險
10月14日(三) 23:07【on.cc東網專訊】舞台王者」郭富城的「舞臨盛宴」演唱會自舉行後，外界一直叫好叫座，巡迴演出的足迹遍布全球各主要地區，適逢澳門的新濠影滙綜藝館於十月二十七日正式開幕，為打響頭炮特地邀得城城作為首位於「新濠影滙」演出的歌手，將在十一月七日舉行「舞臨盛宴」演唱會。
空降澳門站前，城城將會先到新加坡演出兩場，然後會全力為新濠影滙綜藝館的演出做綵排。由於城城屬首位在當地舉行個人演唱會，因此城城和製作團隊特地為這個特別版演唱會，設計一個劃時代的全新舞台，當中包含一個多角度呈「V」形的升降伸展台，讓城城演出時可以近距離跟觀眾接觸。
以往城城的演唱會舞台都極盡視覺效果，今次澳門站就更變本加厲，整個升降台可以升高到場內的企位搖滾區，更能夠遠至控制台，為的是讓無論企或座位的觀眾，均可以超近距離見證城城的舞姿。由於演出製作龐大，加上舞台設計特別，製作單位特地為城城及所有演出團隊買下近億港元的保險。除了舞台落足心機，製作團隊亦會用電腦和投影機，造出立體的幻影視效，為城城營造氣氛，肯定令觀眾目不暇給。
對於今次的澳門站演出，城城自己亦大表期待，因他亦是首次嘗試跟現場觀眾作近距離表演，他說：「因為今次係全新嘅舞台設計，好想配合新濠影滙綜藝館呢個全新高規格場館，想拉近觀眾距離嘅概念，特別去加強升降伸展台，令今次同搖滾區嘅觀眾互動更多，呢個概念我相當重視，一定要有份參與舞台設計同畀意見。更重要係同我嘅歌舞可以完美配合。所以近來一有時間就同我嘅團隊開會，參與舞台設計同構思。」

郭富城早過麥當娜登陸澳門新場開騷
【on.cc東網專訊】 早前親臨透露將於11月7日舉行演唱會的城城，原來門票資料已悄悄於facebook公開，其「舞臨盛宴夢幻距離澳門站演唱會」將於9月22日公開發售，票價由港幣$680至$1,580不等。由於城城已強調會在「夢幻」距離與粉絲全接觸，又指這將會是其首個設立搖滾區的演唱會，承諾與歌迷「以歌會舞」，消息在facebook發布後，粉絲們即時讚好，並留言表示非常期待城城的演出。
而對於國際天后麥當娜將於明年2月在同一場館開騷，城城謂：「以前喺華納唱片時代，我同麥當娜同公司，但未有合作機會。我都熱愛舞台藝術，當然好欣賞麥當娜呢位舞台女王喺舞台上嘅超亮麗舞台視覺效果，特別係佢嘅舞蹈，每部分都有主題，真正超乎聲色藝，所以有機會我一定會去現場欣賞，有好大可能我會去澳門站。因為因緣際會，我同佢算係間接喺澳門同一個嶄新嘅演出場館結緣。澳門新濠影滙綜藝館，係希望打造成一個世界級表演者嘅舞台，其實我十分榮幸能夠喺佢演出之前嘅11月，喺呢個場館舉行佢哋嘅首場演出，即係我嘅個唱，所以我嘅團隊已經全情投入，設計全新舞台同視覺效果。」

風騷現身新濠影匯綜藝館　城城爆想結婚
【on.cc東網專訊】 位於澳門的新濠影匯投資32億美元，是一個以電影為主題的娛樂休閒度假勝地，即將於10月27日隆重開幕。
其中「新濠影匯綜藝館」設有夢幻舞台，舞台王者郭富城（城城）成為首位在「新濠影匯綜藝館」舉行演唱會的歌手，之後還會陸續再有其他巨星在此舉行演唱會。
城城今日下午到澳門為這個影匯綜藝館的啟動禮擔任嘉賓進行儀式，記者會於club cubic嬌比舉行，城城還即場表演了幾個舞步，作為他這次特別版演唱會預演。他表示會於演唱會中設立搖滾區，讓粉絲可以跟他互動，城城說：「呢個搖滾區係我個人演唱會從來未試過嘅，今次個場館嘅設施先做到，為咗配合今次演唱會，我哋設計舞台係為呢個場館打造嘅，呢度嘅設施同新科技先可以做到，天馬行空都可以支援到，係一個夢幻嘅距離，做啲大家意想不到嘅舞台效果，喺歌迷面前跳舞同唱歌，係自己喺舞台上從未試過嘅。（搖滾區可以容納幾多人？）要等大會安排，個場館好似可以坐5,000人。（你到時會拉啲粉絲上台？）都有機會，係近到從未出現過喺我自己嘅舞台上。（呢樣嘢係咪一直都想做？）一直都想做，喺英美啲國際級舞台都唔容許咁做，會有限制，依家可以喺澳門打造到國際級嘅舞台，同我想突破、破格同創新嘅理念一致，所以佢哋搵我打頭陣時，我哋係一拍即合。（演唱會歷時幾長？）我啲演唱會都係三個鐘，個rundown會重新度過，要配合舞台升降位、視覺效果等等，係三面台嘅，我都會參與開會，好多嘢要重新打造。（驚唔驚會有熱情粉絲攬你甚至咀你？）身為歌手都希望可以同歌迷互動，想佢哋透過我嘅舞蹈同歌聲，感受我舞台嘅力量。」
問到城城如此近距離與粉絲接觸，怕否被抽水，他表示：「到時大會會有工作人員控制以防突發事件，會有特別措施應付。我演唱會有握手環節，我試過畀歌迷捉實隻手唔放，仲要拉我埋去，咁大會都有請保安人員保護我，但握手時都成日會受傷，會被抓傷，希望大家錫住我，唔好抓傷我。我都試過畀自己個咪撞親啲牙，依家去握手時識得將個咪放低啲，同埋用手包住個咪，咁撞都係撞到自己啲手指。我最驚係啲歌迷捉住我唔放手拉我埋去，我唔想啲歌迷受傷，因為我愛錫佢哋，我自己受傷唔緊要。如果啲歌迷唔肯放手，最後都會由保安人員分開我哋，但係我隻手已經有愛的抓痕，都習慣咗，習以為常喇。（今次演唱會只係舉行一場？）序幕嚟，係呢個場館嘅序幕，嚟緊會有個國際級巨星接我棒，我可以成為第一位華人歌手喺度打頭陣演出，覺得好榮幸，今次係特別版演唱會，出年紅館嗰個就係另一個舞台同表演項目。今次係好珍貴嘅演出。」
現場見城城左手無名指戴了戒指，問到他是否已結婚，他即說：「呢隻只係飾物，大家誤會咗喇，咁我轉去右手戴喇。（會唔會反映到你其實想成家立室？）我心入面嘅諗法係自己都希望會成家立室同埋有小朋友，因為我本身好鍾意小朋友，不過現階段我嘅工作好繁重同好重要，我媽咪都有叫我抖下，佢見我辛苦，我同我媽咪講叫佢放心，應該休息時我會休息。自己想有突破，努力創一個高峰出嚟，唔容易，會繼續呢個理念。如果達到自己目標，同埋得到大家嘅認同，就去到成家立室嘅時候，都要花幾年時間，可能三年。如果現階段遇到姻緣，亦唔排除會閃婚，都希望得到大家嘅祝福。」