呢排天口又翳又焗，莫講話喺室外做運動，就算喺街行兩轉，件衫都可以扭出水。所以上周六（8日）媽咪姐喺柴灣見到郭富城同舒淇拍新戲《全城戒備》時，吊住威吔擒高擒低，都咪話唔慘。
雖然話夏日炎炎仲要半夜拍戲，但媽咪姐見到睡眼惺忪嘅舒淇未埋位前，做熱身都係求求其踢吓腿，伸伸懶腰再加個騎呢紥馬就算數。結果唔使媽咪姐講，當佢被吊到半空嗰陣，有幾吓失去平衡時，舒淇嗌到「鬼殺」咁聲。當對手城城撲埋去嗰陣，佢仲嚇到成個身凌空挨後㖭！相反本身有跳舞底子嘅城城，事前工夫做到足，拉筋擘髀有板有眼。想學城城身手咁敏捷，睇嚟舒淇都要加緊操練囉！

呢場戲講舒淇墮樓，城城飛撲相救。但因為熱身唔夠，吊上半空後，舒淇明顯手硬腳硬，當城城飛埋身時，佢更好自然咁將自己身體仰後，搞到城城抱唔到佢，NG！城城幾好身手都俾舒淇玩殘。

騎呢Vs專業

身手唔多掂嘅舒淇，求其fing兩下腳當熱身。

反觀玩開健身嘅城城就專業得多。

冷縮熱脹呢個論點，可能由城城（郭富城）改寫。
話說城城早前喺台北小巨蛋開騷，成晚嘅節目基本上係由香港嘅演唱會搬過去，壓軸高潮當然唔少得濕身啦！當時十幾個舞蹈員攞住水槍向着住薄chit chit白色衫褲嘅城城狂射，當時場館室溫甚低，一身濕晒嘅城城，照計冷到騰騰震至係。點知佢嘅小弟弟就竟然愈凍愈脹，直情係神鵰再現。事後城城話，喺香港試過激凸後，今次已經加咗料，着多咗條底，估唔到仲凸多幾錢重㖭！果然係硬漢！

台北再凸　聲稱已經打咗底嘅城城，小弟弟直情好似隻大鵰咁激凸而出。台灣《壹週刊》圖片

細佬，唔好強出頭喎！（設計對白）台灣《壹週刊》圖片

面對激凸嘅城城，成班女fans好似癲咗咁，個個伸長隻手。台灣《壹週刊》圖片

香港凸首　喺香港嘅演唱會中，城城激凸，當時已令人嘩然。點知原來係小兒科。