同你吟一吟 - 城城谷戲

嚟緊八月一、二日將會响台北小巨蛋舉行「舞林正傳2」演唱會嘅郭富城,上個禮拜六(七月十八日)專登响西門町舉行簽票會答謝歌迷。
啱啱被選為「2009聽障奧運國際代言人」,今次城城個唱開part 2亦不忘做善事,捐出二千五百張門票,安排公益團體嚟睇騷。


開簽票會無非想引起更多人關注「聽奧」,但身為大使嘅城城,居然响台上大講麻辣火鍋,之後仲將話題移去佢三部電影作品《殺人犯》、《白銀帝國》同《全城戒備》。「《白銀帝國》31日在台灣上映,大家記得去看,也希望今年在金馬獎上能有我的作品,最近在拍《全城戒備》,是科幻動作片,明年暑假會上映……」
城城細心講解每套戲嘅角色性格,講咗廿分鐘先肯收口,大會主題變成大配角,好在佢仲記得示範幾招「聽奧」閉幕曲《聽傲江湖》手語動作,否則呢位大使絕對要扣分。


金馬獎預我呀!(設計對白)


《殺人犯》好收得呀!(設計對白)
八百多名台灣fans唔理天氣有幾熱,齊集响西門町見偶像,難怪城城咁風騷,特別多古怪動作。


城城示範其中一段手語動作,台北市市長郝龍斌一齊做,不過由於天氣太熱,跳咗一陣城城已經標汗。



落台幫現場八百幾個fans簽票,城城仲額外幫小朋友簽名响個波度,其間又叫工作人員打包麻辣鍋,等佢轉頭帶返香港,唔知熊黛林有冇份呢?



刊於1011期《壹週刊》