近期咩係最hit？仲講緊MJ？Out晒啦！呢期最多人講，肯定係張海報又似《閃靈》又似《蝙蝠俠》嘅港產片《殺人犯》。
呢套由郭天王孭飛嘅懸疑片，上畫短短9日已經收過7百萬，單睇票房絕對唔失禮，不過有網友睇完後上網不斷開post狂插電影嚴重爛尾，劇情犯駁兼對白騎呢，似笑片多過懸疑片。有影評人破天荒畀負分，更有人在facebook開設「殺人犯回水區」，甚至發起罷睇《殺》片靚女編劇杜緻朗的戲。
俾觀眾鬥爆反而有話題，仲有郭富城做殺人犯做到現晒紅筋青筋執爛攤，下屆影帝冇走雞啦，城城！

影評人點睇
石琪：★★
家明：★
朗天：★★
陶傑：「呢套戲創意有5粒星，但整體我就no comment喇！戲入面有好多破綻，例如郭富城收養孤兒時冇理由唔知個細路嘅來歷，直頭當觀眾白癡啦！套戲2/3係驚慄片、1/3係喜劇，一張飛睇兩種戲，抵！」

網友鬧爆
網友除咗開post狂鬧《殺人犯》，仲落足心機惡搞電影海報，又將導演同編劇張相擺上網俾人點相。

facebook的「殺人犯回水區」，暫時有93個會員，有網友更將電影海報惡搞，靚仔城城慘變黃牙四眼小丑，更將宣傳口號改為「草菅人腦」，影帝都冇面畀。

導演周顯揚（左）曾做過《色．戒》助理，負責資料搜集，拍《殺人犯》時，李安打過3次電話畀佢，但談話內容就死唔肯講，而負責編劇的周導演女友杜緻朗（右），曾編過《不能說的．秘密》等，新作係周杰倫主演的《蘇乞兒》，杜緻朗早前接受訪問時表示，每次寫劇本都要觀眾估唔到結果，又話事前做足資料搜集，點知今次衰喺結局手上。

忽然自爆
飾演警察的郭富城身邊人一個一個被殺，種種跡象顯示他就是殺人兇手。編劇冇寫任何伏線畀觀眾估真兇，但去到中段突然由城城個幾歲養仔突然自爆係真正殺人犯，更話自己患有不老症，表面上係小朋友，真正身份其實係城城同父異母哥哥，因為細個經常被城城恰，於是一心搵佢報仇，咁啱俾城城兩夫婦收養，又咁蹺識到一個患有早衰症的朋友幫佢殺人，絕對天馬行空過畢佬套《奇幻逆緣》。

飾演郭富城同台灣女星張鈞甯（右）仔仔的童星譚真一（左），之前啱啱喺《ID精英》入面做郭晉安個仔希希。

離奇血掌
《殺》片一開始有勁多線索話畀觀眾知城城就係殺人犯，例如衣櫃無故有城城的血手印、懷疑被城城推落樓的警員泰哥，指甲中有城城的衣物纖維，點知去到後段又話城城根本冇殺人，而且冇同泰哥見過面，咁又點會有衣物纖維呢？連編劇自己都寫到亂晒籠，觀眾想唔睇到一頭煙都唔得啦！

大陸上司
城城飾演的總督察凌光，身邊所有同事，包括張兆輝、錢嘉樂、黃又南等全部係講純正廣東話的香港人，但城城上司無厘頭由內地演員董勇（小圖）飾演，講普通話唔配音，極之騎呢；而城城一開始已被懷疑係兇手，但又可以繼續出入案發現場查案，後尾被拘捕後更可以一句話保釋就走得甩，太過兒戲。

電影有內地資金，搵內地演員參與唔出奇，但至少都搵個合理少少嘅角色畀佢吖！

游水殺人
城城知道養仔係兇手後，諗住捉佢出深海浸死佢，但其實要浸死一個細路仔又使乜出到浮台咁遠呢？到後來城城被送入精神病院，點解佢又唔將個真相講出嚟？既然佢個養仔都話曾經被送去研究，要搵番佢個病歷紀錄應該唔會太難啦！本刊曾致電電影公司，想訪問編劇杜緻朗，直至截稿前仍未回復，睇嚟杜編劇真係要盡快出來解謎喇！

城城去到老遠浸死一個細路已經夠好笑，但最搞笑係原本個細路識游水，轉個頭已經爬番上浮台。

紅筋眼　郭富城繼《三岔口》後繼續歇斯底里式擘大口，好在佢今次做瀕臨崩潰的嫌疑殺人犯，啱晒佢做。

勁血腥　電影不斷穿插超血腥場面，鐵釘插眼、電鑽放血乜都有，唔少觀眾更俾頭一幕嚇到嗌咗出聲，未睇嘅記得唔好遲入場。

戲中好多地方唔合理，有觀眾睇到打鼻鼾，更有人嬲到爆粗，完場時狠插：「X！爛戲一套！」