【王者傳奇之舞功蓋世】米高積遜（Michael Jackson，簡稱MJ）舞功獨步天下，無論是向後滑行的moonwalk，還是身體45度角前傾的anti-gravity lean，20多年來在舞台上留下輝煌的傳奇軌迹，模仿者眾。MJ前日猝逝，歌迷心痛欲絕，郭富城已決定在8月台灣演唱會中，增設致敬環節。自認是MJ死硬派fans的陳偉霆昨晚則率先在《勁歌金曲》以moonwalk向MJ致敬，更表示收到偶像死訊後喊足一朝：「家冇晒靈魂。」

前日猝逝的King of Pop米高積遜陪着香港人成長，不少香港歌手也視他為偶像及模仿對象，就連做人態度也深受MJ影響，表表者有舞台王者郭富城。對於偶像突然去世，城城傷痛之餘，已即時決定於8月1日至2日在台灣小巨蛋舉行的演唱會中，特設紀念環節向MJ致敬。
城城昨日在金鐘出席聽障奧運記者會時，談到個唱上設致敬環節一事時，他說：「Michael Jackson由我開始接觸舞台到熱愛舞台，佢都喺我心中。佢對我有好大啟發，令我有另一種風格。現階段演唱會有冇致敬就未有定案，所有嘢交畀producer諗，睇佢諗用乜嘢形式向我唯一嘅偶像致敬。」

「佢係真正舞台王者」
對於有報道指MJ生前曾服用很多止痛劑，城城即保護偶像說：「唔好有太多揣測，如果鍾意一個人，佢作為偶像做乜嘢都會支持。你欣賞係佢嘅才華，平時佢嘅生活唔需要理。」
城城表示這兩天重看MJ生前演出，越看越難過，他說：「佢每一個作品都係經典，睇到覺得好傷心，因為佢帶我睇到好多嘢，佢陪住我成長，相信唔只我，其他人心中都會感到難過。」原來他本打算赴英欣賞MJ的復出個唱，惜此夢難圓。提到早年曾在高雄親睹MJ演出，城城謂至今難忘：「嗰次佢個舞台有個大螢幕，係全世界最大嘅。雖然離台好遠，但我感覺到佢嘅力量，所以呢啲先係真正嘅舞台王者，無人能及，亦冇人可以代替，真係前無古人，後無來者。」
對於被封為港版MJ，城城說：「相信唔只天份，後天努力都好重要。工作上我從來唔會鬆懈，最重要係點樣超越自己。每個人都有自己成功嘅一面同特質，冇人可以代替其他人，呢個精神係Michael Jackson啟發我嘅。」

「似冇咗個跳舞大佬」
至於自認是MJ死硬派fans的陳偉霆（William），昨日出席無綫在荃灣舉行的暑期活動時，謂得悉偶像死訊後喊足一朝，還收到女友Angelababy（楊穎）等30多個朋友的慰問短訊。William說：「MJ係神級地位，我家冇晒靈魂。我15歲參加跳舞比賽都係用MJ嘅舞步贏咗獎學金，連首《Taxi》都係參考佢舞步，家群龍無首。我今晚（昨晚）會上去《勁歌金曲》悼念MJ，仲會模仿MJ演繹《Billie Jean》，所以我諗我會更激動。我本來好期待佢今次個演唱會，聽講佢會有新舞步同新嘗試，可惜家已經睇唔到，真係好失望。」 William又謂計劃為MJ舉行悼念活動，他說：「佢走咗，我好似冇咗個跳舞嘅大佬咁，不過我將來都會繼續加啲MJ嘅元素喺我嘅歌入面，我仲想搞一個悼念會，希望成班年輕人聚埋一齊跳MJ嘅舞，畀多啲人認識MJ，就算得我一個人都會搞。」

「佢嘅歌改變咗世界」
昨晚William以一身MJ經典打扮黑西裝配白恤衫現身《勁歌金曲》表演moonwalk，他說：「我屋企隨手攞一件衫都似MJ，我有首新歌係講台上巨星，我想將呢首歌名改為做《MJ》。」提到城城也有一首歌叫《MJ》，可擔心被人拿來比較時，他說：「唔怕，冇所謂啦，我都係向佢致敬。」 此外，謝婷婷昨日現身觀塘apm出席護膚品宣傳活動，對於MJ逝世，她表示十分傷心，並說：「本來我約咗霆鋒、栢芝同埋成班朋友買咗飛去睇佢演唱會，我細個已經好鍾意佢，佢係一個legend，佢嘅歌《Heal the World》改變咗世界，好多人都誤會佢，以為佢乜嘢都有，其實佢乜嘢都冇，佢冇咗童年，佢喺Neverland都係想做番細個嘅事。」 採訪：王連連、何慧斯、顏英儀 攝影：仇志德、陳志嵐、黃文成

話你知：網絡靈堂祭祀偶像
米高積遜突然去世的消息震驚全球，世界各地不少fans均哭斷腸，昨日有內地網民特別花心思，為他在互聯網上設計一些悼念拜祭的網頁，讓全球fans可以一起悼念偶像。
其中有一個國產網絡靈堂，中央放有米高的遺照，網友可以香燭供奉或以鮮花致意，兩旁則掛有輓聯「一代舞神笑洒人間、巨星殞落魂牽萬眾」。
另外也有一些網站設有米高的墓碑及紀念館，進入網頁後可隨意挑選不同鮮花、祭品、香燭或祭酒來拜祭，還可選擇摺千紙鶴或點燃燭光來長伴米高的墓碑。
撰文：丁寧

關錦鵬新片頌舞神
King of Pop米高積遜猝死，大導關錦鵬表示會用新片《用心跳》將米高的舞蹈精神發揚光大，他前日在上海馬勒別墅舉行開鏡儀式時說：「我非常崇拜他，我不會刻意去用他的舞蹈創作，但是他的舞蹈精神一定會有所體現。」

盛智文赴美追定金
米高積遜93年曾決定在港舉行個唱，但因他開騷前臨時通知要延期，最終取消。當時的搞手Andrew Bull前日透露當年惟恐未能收回約780萬港元定金，另一搞手盛智文（圖）曾親赴洛杉磯收數。

楊超成難忘會米高
米高87年來港旅遊，楊受成胞弟楊超成（圖）在米高往參觀其珠寶公司時，曾接待這位巨星，他昨日說：「佢個人好nice，身邊冇保鑣，只係一、兩個助手，好隨和又冇架子，仲買咗差唔多10萬蚊珠寶。」

舞台王者米高積遜80年代已踏上舞台，光芒四射，模仿和崇拜他的人遍佈全球。

郭富城自認無論舞姿及做人態度均深受MJ影響。資料圖片

城城昨日透露計劃在8月個唱中增設悼念環節，向MJ作最後敬禮。

MJ獨步天下的moonwalk曾迷倒世人，成為舞林中人必學舞步。DVD圖片

William昨晚在《勁歌金曲》上以一身M J打扮表演moonwalk舞步。

謝婷婷昨日謂本已購票與兄嫂赴英看MJ演唱會。

內地fans在網上為偶像米高積遜設計靈堂。互聯網圖片

米高的虛擬墓碑可供歌迷選擇不同鮮花來拜祭。互聯網圖片